Пасэм сымаджэ хъурэм е у1эгъэ хьылъэ зытыращэрэм к1апщэ фаш1эу адыгэхэм хабзэ ахэлъыгъ. К1апщэм сымаджэм иуз щагъэгъупшэным пае ныбжьык1эхэм джэгук1э зэфэшъхьафхэр щызэхащэщтыгъэ. Гущы1эм пае, «Хэта нахь 1ушыр?» зыфи1орэ джэгук1эр. Ащ шэпхъэ гъэнэфагъэхэр ублэхы мыхъунэу и1агъэх. К1алэм пшъашъэр къахещы, ар ежь к1алэм къыубыты зэпытын, ежь пшъашъэр к1алэм зыримыгъэубытыным фэш1 1эк1эк1ыжь зэпытын фае. Джэгухэзэ пшъашъэмрэ к1алэмрэ мыщ фэдэ гущы1эхэр зэпагъодзыщтыгъэ:

-    Цыгъо ц1ык1у сыхъоу
Гъурбым силъэдэжьмэ
Сыдыр уиамалти, о?
-    Чэтыухъу сыхъоу
Укъэсыубытмэ
Укъысфэнэжьыгъэба, о?

-    Бзыу ц1ык1у сыхъоу
Губгъом сибыбэжьмэ
Сыдыр уиамалти, о?
-    Бгъэшхъожъ сыхъоу
Укъэсыубытмэ
Укъысфэнэжьыгъэба, о?

-    Мэз пчэн сыхъоу
Мэзым сыхэлъэдэжьмэ
Сыдыр уиамалти, о?
-Тыгъужъыжъы сыхъоу
Укъэсыубытмэ
Укъысфэнэжьыгъэба, о?

-    Тыгъужъыжъы сыхъоу
Мэзым сыхэлъэдэжьмэ
Сыдыр уиамалти, о?
-    Шкончау сыхъоу
Укъэсыук1ыжьми
Укъысфэнэжьыгъэба, о?

-    Хьант1эркъуакъу сыхъоу
Псым сыхэлъэдэжьмэ
Сыдыр уиамалти, о?
-    Блэшхъожъ сыхъоу
Укъэсыубытыжьми
Укъысфэнэжьыгъэба, о?

-    Сымэджэшхо сыхъоу
П1эми сыхэгъолъхьажьмэ
Сыдыр уиамалти, о?
-    1эзэшхо сыхъоу
Укъэзгъэхъужьмэ

Укъысфэнэжьыгъэба, о?

«Мыщ фэдэ джэгук1эм мэхьанэу и1агъэр, - е1о Тыгъужъ Рушди, - ар ныбжьык1эхэм я1ушыгъэ, ягулъытэ ичаныгъэ зынэсырэр, къэгущы1эрэм зэредэ1урэ ш1ык1эхэр къагъэнэфэныр арыгъэ».