Шъо акъыл шъодгъэгъотын гухэлъ тиIэкIэ арэп. Непэ, джыри  хэку тиI тэIошъумэ, ар, сыдырэ къиныгъуи зыпэкIэкIыгъэхэу хэкум щыпсэурэ адыгэхэм къызэрэдахыгъэр тэшIэ ыкIи шъори хъурэ-шIэрэ пстэуми гу зэралъышъутэрэм тыщыгъуаз.

ШъушIэн фаеу тызыфаер ары; бэ шIагъэу тышъупэкIэрэплъы ыкIи «Черкессием ихэкупсэхэу» зытлъытэжьынымкIэ гушхуагъэ къытэзытырэри шъоры. Мыщ дакIоу шъо кIуачIэу къытэшъутырэм ишIуагъэкIэ хэкумрэ хэхэсымрэ азфагу лъэпкъ гупшысэм фэгъэхьыгъэу зэпхыныгъэ пытэ илъы хъуным тыдэлажьэ.

ЦIыфхэмрэ лъэпкъхэмрэ я гъэшIэ гъогу, мэхьанэшхо зи1э къэгъэзап1эхэр, мафэхэр ык1и нэгъэупIэпIэгъу уахътэхэр къафыкъокIэу къыхэкIы. Ащ фэдэ уахътэр къызысырэм, лъэпкъым ыпэ итэу кIэщакIо фэхъухэрэм аIощт-ашIэщтхэм, ахэр зэрэзекIощтхэм мэхьанэшхо яIэ мэхъу. Мы гупшысэ-зэхашIэм тыкъыпкъырыкIызэ къэтIонэу тызыфаер, къэблагъэрэ кIэтхыкIыжьыным Адыгэ – Чэркэс лъэпкъым пае мэхьанэ ин иIэу тш1ош1ы.

Тятэжъмэ лъэпкъгъэкIод къязышIылIэу ахэр яхэку изыфыгъэхэм, хэкум къинэжьыгъэ тIэкIоу шъори купитфэу шъуаугощыгъ. Тэри титарихърэ тихэкурэ адытиIэ зэпхыныгъэр зэпаутышъ, тызэпэIапчъэ ташIыгъагъ. Непэ лъэпкъэу тыщыIэным, тинеущырэ мафэрэ зыфэдэщтым фэгъэхьыгъэу тиIэ щынагъор;  джа тызэрэзэрэугощыгъэр, тызэрэзэкIэрычыгъэр ары.

Тэ Абдзахэхэр, Къэбартаехэр, Шапсыгъэхэр, Убыххэр, Бжъэдыгъухэр, КIэмгуехэр... зэкIэ Адыгэхэр зы лъэпкъэу тызэрэщытым, тэ «Адыгэ»кIэ тызэджэжьы пэтми нэмыкIхэр «Черкес»кIэ къызэрэтаджэхэрэм; тятэжъхэми Черкес лъэпкъ гупшысэм дырагъаштэу яхэку ЧеркессиекIэ зэреджагъэхэм шIошъхъуныгъэ афытиI.

Мы кIэтхыкIыжьыным тэ къызэрэтэупчIыщтхэр непэ «ты хэт?» къодыер арэп, къэкIощт лъэхъаным тызэрэхъущтыр, тыхъунэу тызыфэещтыри ары. Арышъ, кIэтхыкIыжьын Iофтхьабзэр екIокIыфэ мы итэкъухьагъэ шIыкIэ-гъэпсыкIэм тызэрэфэмыер, зэкIэми зэдатштэу «Тызэрэадыгэр, Тызэрэчеркес»ыр имыкIыжьынэу гум-шъхьэм идгъэтIысхьан, зы лъэпкъ тыхъужьынэу тызэрэфаер зэрэдунаеу щыдгъэIун фае.

Ары! КIэтхыкIыжьыным е адыгейцэу, къэбэртаеу, шапсыгъэу ... зыщядгъэтхынышъ, тызэритэкъухьагъэр ыкIи Урыс, Тырку, Араб тызэрэхъужьыщтыр къэдгъэлъэгъощт е зэкIэми тызылъэпкъ - тыадыг, тычеркес тIонышъ, зы лъэпкъ тыхъужьыным игъогу тытеуцощт.

ТынаIэ къышъутет!

Тилъэпкъы ипащэхэр, тихабзэ IофшIапIэхэр, ШIэныгъэхэмкIэ Урысие Академием зы лъэпкъэу тызэрэщытыр къыкIиIотыкIыжьыгъэ пэтзэ Дунэе Адыгэ Хасэмрэ Тиреспубликэхэм япащэхэмрэ мыщ фэдэ мэхьэнэ ин зиIэ Iофыгъом ыдэжькIэ гугъуемыл1ыхэу зи къызэрамы1орэр, ари пакIошъ тицIыфхэм ашъхьа нахь къызэIагъэхьау зэрэдезэкIохэрэр лъэшэу тэгъэшIагъо ыкIи тилъэпкъыр лъэпкъ хъужьыным пае мы лъэубэкъоу тарихъ мэхьанэ ин зиIэр шъудзынэу гугъапIэу тиIэр нахь ины шъушIынэу тышъущэгугъу.

Орэпсэу Адыгэ Лъэпкъым илъэпкъ банэр!

__________________________________________________________________________________

Черкессия.нет – www.cherkessia.net  
Черкес.нет – www.cerkes.net
Памуккалэ университет икъафкъас ныбжьыкIэ куп